Sodam Chicken (已結業)

中環嘅大館翻新後,好多人都專程去嗰度打卡，欣賞完古蹟後當然要係附近搵返間餐廳填飽個肚啦。sodam chicken嘅距離同大館只有幾分鐘路程，亦位於蘭桂坊附近，地點非常方便。呢間餐廳地方唔算好大，坐滿曬人非常熱鬧，如果唔想等位嘅話我諗就要一早book定。我同我個朋友都係食肉獸，所以我哋一致同意要試晒炸雞同焗雞兩款。首先我哋叫咗一份標準BBQ香辣焗雞，於我來講我覺得一份好嘅焗雞要有出色嘅醬汁同埋嫩滑嘅雞肉，呢一份焗雞完全符合曬兩個條件， BBQ醬汁啱晒鍾意食辣嘅人，真係睇見張相都流晒口水。第二份就係標準嘅無骨蜜糖芥末香蔥炸雞。試完鹹嘅焗雞當然要試吓甜嘅炸雞，炸雞最怕就係入面啲雞肉會變到好乾，好似食緊炸粉咁樣，呢份炸雞都依然保持到嫩滑嘅雞肉，食得出爽脆嘅炸雞表皮，配埋香蔥一齊食令到成個感覺冇咁油膩。講樣嘢食當然要講下啲飲品啦，飲品都係食韓式炸雞其中一個重點。我叫咗一杯蘋果特飲，份量非常驚人，杯面大過我個手掌，啱晒兩個女仔share飲，50幾蚊抵到爛呀。我個朋友就叫咗杯水果茶，味道幾清新，中和到食炸雞嘅肥膩感。今次嘅用餐我哋非常滿意，期待下次喺蘭桂坊飲完野再行上嚟滿足我哋食炸雞嘅願望。