天池日式放題 (已結業)

一向都鍾意食放題，一個價錢食到飽，對於相對大胃口既我就梗係抵啦！今天來挑戰呢間天池，在油麻地地鐵站附近，相當就腳。食物選擇都幾多，仲可以加錢$88升級有多啲好嘢㨂。呢度用電話落單，快捷方便，好似而家都越來越多放題店用呢種方式了。食放題梗係要食刺身，三文魚、八爪魚、北寄貝、馬刀貝、甜蝦、虎蝦等等係唔駛加錢都有得食，升級後仲可以試埋阿根廷珍寶赤蝦、吞拿魚、油金魚、帆立貝等等，刺身好新鮮，賣相一流，真材實料！壽司因為連埋舊飯我就少叫，但有個海膽刺身甜蝦甜筒杯一定要叫，海膽新鮮，配落新筒杯（唔係紫菜）好fusion!另外當然要叫啲熟食俾小朋友啦，日本番薯仔串、波羅串、芝麻雞翼、雞肉串、鹽燒鯖魚等等都好唔錯，仲有榴槤炸彈、香草羊架、黃金大虎蝦、海膽黃金蠔、焗扇貝、牛脷串都係大人喜愛之物。甜品和飲品就自己出去攞，飲品主要係韓國汽水、鴻福堂系列同啤酒，想飲茶都可以出去自己斟。除咗雪糕櫃之外，佢出邊仲有個甜品架放咗不同蛋糕仔，而且佢嘅雪糕仲有啲好特別嘅味道可以揀，例如海鹽味、玄米茶味等等，幾得意。