福丸水產 鉄板燒 日本料理 (已結業)

由於收工太夜，周圍睇下有邊間餐廳仲未收舖。見到荃灣嘅福丸水產有宵夜時段，我哋就9點後入座。餐牌圖文並茂，食物圖片非常吸引。每次食日本野都必食牡丹蝦壽司，呢度嘅牡丹蝦非常大隻新鮮，味道鮮甜，配埋飯加wasabi 豉油一齊食，好美味。牛油果軟殼蟹卷一共有六件，每一件都放左三片牛油果在上面，配以卷物入面嘅軟殼蟹卷，軟殻蟹炸得好香口，非常滋味。帆立貝天婦羅，好少係居酒屋食到天婦羅版本。帆立貝好大隻，外脆內軟，再配埋小小海鹽一齊食，好Juicy。松葉蟹腳天婦羅🍤好大條，同樣滋味。火炙左口魚壽司中，左口魚燒到好香，食落去好Creamy。海鮮炒飯好大碟，驟眼睇配料相當充足，有鰻魚、蝦、蔥花同埋多款海鮮等，炒得好有鑊氣，食得出係用日本珍珠米炒成的。炸白飯魚餅炸到金黃色，再配少少粟米，咬落去脆卜卜之餘，白飯魚嘅份量都非常多，再配少少海鹽吊下味，正。除此之外，仲order左海膽壽司、火炙三文魚、黃金蟹膏、松葉蟹膏甲羅燒、吞拿魚腩壽司同埋椰子雪葩，為呢一餐豐盛嘅日本菜畫上句號。