Steak Bar (已結業)

又一個星期六下午，百無聊賴周圍走走，走入登龍街，林林種種餐廳選擇好多，最後老闆話事揀左呢間主要食steak嘅餐廳。餐牌食物種類不算多，餐廳名已經話左你知佢嘅專場，所以又點會唔叫steak呢⋯⋯除左餐牌嘅仲有一張special吉列和牛，男友見到呢個就已經雙眼發光喇男友嘅吉到和牛扒 $278 - 首先每個餐都會配上一份芝麻醬豆腐，一份沙津，同一個有飯素係面嘅飯，沙津菜新鮮，豆腐滑，質素屬水平。主角黎喇，由於吉列扒上菜時仲係生嘅，所以會配上一個鐵板，食前燒一燒生嘅兩面，生熟可以自己決定⋯⋯和牛肉質軟淋而且充滿住油香，油香重嘅牛配埋飯食一流。雖然未到入口即化嘅境界，但以呢個價錢係絕對交到功課。頂級板鍵牛 $215 / 5成熟 - 呢件板鍵牛好厚身，有整個手掌咁大，牛味偏濃，肉質結實有嚼勁，同吉列和牛完全兩個感受嘅。兩份牛都會配上碟角嘅海鹽同醬汁，靚牛黎講，我個人較鍾意沾鹽食，因為鹽唔會蓋住牛嘅味。套餐唔包飲品要另叫凍柚子蜜 $35 薄荷茶 $35 總括黎講，餐廳環境舒適，質素中上而且份量好足，以呢個價錢黎講我覺得絕對合格有餘。但飲品就偏貴左d，但以銅鑼灣區黎講，都算係無可避免嘅事喇。