褔村日本料理鐵板燒 (已結業)

Omasake ($1300 per head)間唔中生日呀紀念日想豪一豪，食下omakase就岩哂，刺身迷一定好歡喜。食物質素又好，服務仲好周到添。首先先黎頭盤，凍蕃茄、糖漬栗子、芝麻豆腐，清新開胃。之後就黎刺身啦，七款超級新鮮既刺身，有赤貝，螺片，好爽口；豉油漬吞拿魚背，乜都唔洗點，鮮香味足；金目鯛、赤蝦，好爽甜嫩滑；池魚，油香重；吞拿魚腩，入口就滿口油脂，脂香滿分。而且刺身新鮮無經過急凍，口感更出色。頭先赤蝦既蝦頭，仲可以揀湯上同炸。輕輕一炸好脆口又鮮味。之後就到鐵板燒，蟹肉煎香拌上蟹膏漿，蟹肉鮮嫩超甜。燒牛肉，薄薄肥瘦平均，牛肉味香濃，中間仲夾住炒香既炸蒜同蔥，惹味到不行了。燒鰻魚，鰻魚多功夫就大家都知，但呢度既鰻魚依然係即叫即燒。再慢慢去骨，淋上鰻魚汁味道鹹香鮮味，新鮮鰻魚肉質煙韌有口感，配上煎得極脆既鰻魚皮，一嫩一硬口感超讚。食完咁多肉，飲返碗鮮美味甜既魚湯。壽司有油甘魚、吞拿魚腩，肥美滿口油香；海膽 不得了，鮮甜度爆燈，一啲臭腥味都無。整體黎講，食物質素好好，睇得出好俾心機。同埋份量超多，飽到痴線。咁既食物同服務質素係完全唔算貴，推介。