嘆杯貓茶

營業中

休息中

琴日同老婆去開葵涌廣場行街，又唔想坐低食，想掃下街食啲小食，於是就見到呢一間嘆杯貓茶。見佢以貓做主題，我老婆又非常之鍾意玩貓，見到佢啲奶茶同小食有幾吸引喎，於是就去嗌杯嘢飲同叫啲小食試吓。我哋嗌咗一杯黑糖珍珠鮮奶茶，同埋一杯朱古力鮮忌廉Oreo脆脆。見有啲口痕，又嗌埋小食，嗌咗個脆炸爆汁小籠包，同埋一個甜食朱古力冬甩。我哋就企咗喺隔離食，個爆汁小籠包真係包如其名，一咬啲汁就咇晒出嚟，差啲唧咗落隔離嗰個人嗰度。食落個小籠包又幾香口，炸得嚟又唔過分油膩。嗰兩杯飲料都比一般台式茶飲店好飲，啲黑糖夠濃郁鮮奶夠嫩滑。另一杯Oreo脆脆，口感好好，朱古力同忌廉比例恰到好處，加埋啲Oreo夠晒爽口。個店員仲好友善，同我哋傾咗好多貓經，佢仲邀請我哋下次有時間，可以拎埋啲小食去佢哋距離唔遠嘅貓Cafe，可以玩住貓咁飲嘢，貓Cafe嘅收入仲會撥作救助流浪貓嘅用途𠻹。