貓喵堡 (已結業)

難得的好天氣，同媽咪出街去尖沙咀行街街。行到攰既時候，諗起之前朋友介紹既動物CAFÉ—貓喵堡。所以就拉著媽咪前往CAFÉ尋貓一番了。一入到餐廳就見到大大小小既貓咪滿佈店鋪既四周，最難得既係貓咪們都好乖巧，又唔會怕人類，當拎起店內既玩具佢地都會同客人玩，俾到一種除左食野之外仲可以同貓咪有互動既餐廳新食法。至於野食方面，因為媽咪想食得健康又夠飽肚係，店主介紹左台式滷肉飯，果然滷肉飯上有不同種類既蔬菜，而且仲有溏心蛋奉上，媽咪食完之後都話肉汁都好好味，好有口感。而我就叫左個慢煮牛柳螺絲粉，因為慢煮既關係，店員有同我地講製作需時。等左一陣之後，先試一口螺絲粉，發現螺絲粉有著香濃既蘑姑汁香，超好味! 再試牛柳，清楚明白到等待既價值，慢煮牛肉果然係會有不同既口感同味道，非常之鮮嫩多汁，極推介俾大家。另外我地各自點左一杯飲品，我點左名為藍天特飲既野飲，真係名副其實係藍天既顏色，顏色係我最鐘意既色，見到都好開心，飲第一啖係一種乳酪既味道，再慢慢飲其實係類似波子汽水，真係十分唔錯～而媽咪就點左女士最適合飲既韓國桂圓紅棗茶，口感甜甜，紅棗味濃，仲有幾粒桂圓，非常滋補，係最岩養生既朋友飲。