黃喵餐廳 (已結業)

我平時去開每一區都好想發掘當區的小店，同店員傾下計，了解更多他們的故事，加上小店感覺更有人情味。今次去葵芳，見到店員派宣傳單張，先發現葵涌廣場另一邊天橋出去會見到滿佈餐廳。呢間店門面好似一間cafe，入到去先發覺呢間餐廳原來兩層，細心仲會發現到周圍都用貓貓作裝飾。原來每枱都會送餐前小食，今晚送越南春卷，春卷岩岩炸好，好脆口。食物我地叫咗無骨鳳爪沙律($68)、蒜蓉炒芥蘭苗($78)、青咖喱雞($88)和薄餅($48)。飲品就叫咗泰式奶茶(小甜)($28)、原個椰青($48)。無骨鳳爪沙律 份量好多，我平時食開小辣就覺得呢碟好辣，但係味道係好食。蒜蓉炒芥蘭苗 炒得好夠鑊氣，加上蒜蓉一齊炒更加香。 青咖喱雞的雞好明顯有用香茅醃製，加上青咖喱汁，味道更加有層次，但是這裏的青咖喱汁比較稀，食薄餅就冇咁掛汁。我覺得泰式奶茶的茶味好突出，好有驚喜。冬陰功醬芝士焗薯條 ($58) 的薯條唔算太脆口，可能比冬陰功浸淋咗。串燒三兄弟($62) 就有雞肉、牛肉、大蝦各一串，個串燒好明顯即叫即燒，加上沙嗲醬，都幾惹味。我覺得整體感覺都好乾淨和新，野食都算中上質素，呢個價錢都算可以接受。