NUTTEA (旺角中心第一座) (已結業)

今日收工好攰，決定去行下街平衡下，經過旺角中心1樓(近新之城方向) 呢間Nuttea 買返杯飲品慰勞自己。見到佢皇牌「伯爵朱古力堅果奶蓋茶」，望落好吸引，飲落至知真係無嗌錯！呢間茶飲店都幾受歡迎，外賣都多人幫襯，不過店員好快手，落單唔使5分鐘就有飲品拎了😊～ 要讚一讚呢個茶杯套裝，方便拎走之餘，寶石藍色紙抽夠實淨，拎得耐都唔驚～我揀咗微糖同去冰組合💫朱古力堅果味奶蓋同埋伯爵茶嘅組合，口感同味道都非常令人驚喜。店員叫我一定要用鏟子食嘅奶蓋茶，堅果奶蓋貨真價實，唔單止有香濃嘅朱古力味，質感非常非常綿厚，感覺好似食緊香濃嘅朱古力蛋糕，朱古力控一定十分滿足😍！至於伯爵茶味道清淡易入口☕️，配合香濃嘅朱古力奶蓋，味道出奇地平衡和諧。飲完之後，豐富到彷似食咗個甜品set咁，又飽又滿足☺️下次經過，會再試下佢另一款推介飲品「宇治金時堅果奶茶」，睇相都已經覺得好吸引，用返同款奶蓋應該好有保證~！