西貢松記車仔麵

營業中

休息中

趕時間！唯有走去松記食早餐啦，雖然前幾日比個阿姐激到紮紮跳，但勝在松記車有位唔洗等，如果走去茶餐廳實爆場等到嘔呀！獨獨早餐行去叫車仔麵最醒目，即刻有得食，上次食出前一丁，今次食個好耐無食既車仔麵多汁就上船喇！牛腩豬紅蘿蔔幼麵多汁，松記既牛腩係堅牛腩，唔係牛腩碎、唔係牛腩渣，大大舊啖啖肉，軟棉鬆化肉汁澎湃，味道溫和香甜，滲出淡淡牛鮮味！豬紅有鮮豬紅既味道，非常有彈性，外脆內嫩，浸得夠入味，good！蘿蔔有少少渣，都甜既，可以接受！幼麵無烚過腍，依然保持彈性同嚥韌，掛上咖哩汁大束大束地送入口，好味呀！發現原來上次碗出前一丁都係車仔麵度煮架，唔怪得湯底味道咁古怪啦，車仔麵湯底加出前一丁湯粉。仲有隻全熟老蛋都係車仔麵度夾囉，我只食太陽蛋或荷包蛋架乍！搞到上次成隻蛋掉左！三餸麵多謝HKD36，西貢價而且依個質數，物有所值。