雲陽 (已結業)

去完pre-wedding返黎，為食麻辣、為見契B仔，約左去試試雲陽，小食爆谷嘅味粉與別一般有香辣味道。水煮魚片好滑又夠麻有薯粉做底增添爽口感。乾煎雞好乾脆其實同辣子雞丁無兩樣，味道鹹香，稍欠配料如花生、腰果之類，有就更完美了。老鍋湯牛筋腩好淋又入味辣同麻十足，不過同水煮野一樣勁油。魚香茄子酥因為係契B媽點嘅，唔睇點餐紙食左都唔知係乜東東，味感唔覺出色。小籠包好多湯汁同肉汁皮亦夠薄，為$10.5一個，有點貴。回鍋肉多腩肉所以都係～油～油～油。甜點辣椒朱古力雪糕同桃仁甜板，雪糕有辣椒皮朱古力味頗濃，口內溶化時先覺得嗆喉，冰凍之中火辣辣，一試無妨，但$52加十巴仙一個球，確實有點貴。桃仁甜板外皮煎過熱熱的似煎湯丸煙靱的，合桃有咬口，淋了少少黑醋同煉奶，係一款值得推介嘅甜品。