和歌山 (已結業)

週日約咗姨媽們去太古城濕平，中午由灣仔出發前，大家決定先喺金鐘地鐡站附近醫肚。因時間比較緊迫，所以就求其揀咗間唔洗等位o既「和歌山日本料理」。午市時份，計埋我地在內，全店都只係得六個客人 ，細小o既店舖感覺好清閒。入座後，店員先送上熱茶及餐牌。四人合共叫咗三碗拉麵同一客炸雞黎分。落好單後，可見身處於玻璃窗後o既師傅仔迅即開始烹煮食物。 一本豬軟骨拉麵（$138）：豬軟骨拉麵湯底清甜，拉麵煙煙韌韌，豬軟骨軟腍脆口，雖然係好唔錯，不過$138碗一啲都唔平 ！ 蒜香和牛拉麵（$168）：因有大量蔥蒜調味，和牛拉麵個湯底味道更為香濃，碗入面所謂o既和牛食落反而勁似本地牛肉，實難同我地剛剛喺日本富良野食過嗰啲比 。 炸雞配自加制柚子醋（$78）：炸雞外皮乾身，但未夠脆口，雞肉則多汁且唔嚡口，份量都好足，加上有沙律墊底，又用上柚子醋調味，酸酸甜甜，一啲都唔覺溜 。位於灣仔及金鐘交界o既「和歌山日本料理」，午市單點拉麵，好味就好味，不過質素未能說服細佬要俾成兩舊水去食囉！