碗碗香 (已結業)

想去誠品搵書，但點都搵下食先！去到加路連山道行下行下，見呢間貴州菜幾特別，於是試下！同老闆傾咗兩句，原來佢嘅貴州人老婆係主廚之外，之前仲要做過達官們的廚師，即刻想試下佢手勢！老闆推薦咗牛肉粉、口水雞，仲有甜品玫瑰冰粉！聽講呢到啲辣唔講得少，驚驚嘅我叫咗小辣試試先！牛展好入味，甜甜辣辣咁好開胃！但最有驚喜係個麵，麵質幾特別，唔係米線又唔似米粉，好滑身但又有咬口，原來係「貴洲直送」米粉，有啲異國風味！至於辣度我個人接受到小辣，而且個湯花椒味都幾重，唔係嗰種單一辣味，幾有層次。至於玫瑰冰粉就好似涼粉，不過就透明嘅！甜甜地凍凍地，食辣嘢配佢就啱哂！老婆話佢應該有加玫瑰露喺入面，不過我就唔係幾食得出XD最後老闆介紹咗一個特色飲品苦丁茶，話解辣一流，飲一啖確係解辣，但苦味真係幾重！原來佢係號稱地上最苦嘅茶，雖然回甘都幾好味，不過唔係人人接受到苦！所以叫之前真係要諗清楚先，唔怕苦確係可以一試！