博多拉麵別天神 (已結業)

呢排天氣好熱好焗，都冇咩胃口食飯。食返碗拉麵，簡簡單單做晚餐就最好不過。別天神喺香港唔同地區都有分店，今次就試吓喺旺角山東街呢一間。一直都好欣賞呢度堅持貴精不貴多，只有兩款拉麵選擇。首先有豚骨拉麵。豚骨湯係經過百分之百嘅豚骨再加純水用壓力煲熬製而成，完全冇味精都好濃豬骨味。配料好簡單，有好嫩既半熟蛋，半肥瘦叉燒，蔥粒同埋木耳絲，冇太多花巧嘅嘢仍然好味。令一款面係蝦味增豚骨拉麵。本身嘅豚骨湯再加上味增同埋大量脆脆嘅櫻花蝦，成功再添增鮮味。而呢款拉麵嘅配料冇用到木耳，轉成粟米，粟米嘅清甜亦可配合更濃嘅湯底。呢度嘅麵用上幼麵，好易入口。如果係重口味人士，想再食得濃味啲嘅話，可以加枱面呢一支特製拉麵汁，其實係用豬柳熬製既醬油，加幾滴可以更加提升成個面嘅味道！再想重口味啲，可以加埋蒜蓉，醃蘿蔔，拉麵胡椒，芝麻等等嘅配料。除咗拉麵之外，呢度都可以加配兩款小食，分別係小龍蝦蟹子沙律同埋煎餃子。沙律由好多彈牙嘅龍蝦肉同埋蟹子組成，放上紫菜到夾住一齊食，又幾好食喎。餃子一碟有四隻，個皮夠薄而且師傅都煎到個底好香脆，加埋少少醋汁一齊食，飽哂。