洪家手作 洪瑞珍三明治 (已結業)

5月18號晚上，路經觀塘開源道，驚見洪瑞珍三文治喺香港出現，望真啲原來係話自己係洪瑞珍家族喺香港開嘅三文治店，話自己係洪二代嘅洪家手作。其實我又唔介意佢講嘅係真定假，只要係由台灣直接入口原材料做嘅三文治，我都有興趣試吓，所以就決定幫襯。見到佢總共有八款口味，每件$22 ，買滿六件就$20 ，所以就索性買齊八款口味，諗住第二朝同同事開心share。其實食落味道都正常，都係有奶油忌廉再搽果醬或者夾一塊芝士火腿之類咁，大家都覺得幾好味。點知喺當日下午開始，大家就開始覺得有點肚痛，同埋開始有啲肚瀉嘅症狀，開頭都不以為意，點知過得一兩日大家都未止瀉，仲有同事發埋燒添，過兩日就見到新聞話呢間無牌食物製造工場嘅出品搞到好多人食物中毒，真係嬲到震😡😡😡就係咁，我哋呢班打工仔就要集體請病假，前前後後搞左6-8日，我哋嘅腸道先開始回復正常，真係人都癲！其實最嬲係佢喺佢嘅社交平台專頁毫無悔意，仲話係因為疫情搞到政府遲遲未批出佢嘅食物牌照，真係離晒譜，咁搞法想再有人幫襯佢都幾難🤬🤬