閨•家 (美基樓) (已結業)

今日先發覺V city附近有間咁方便嘅外賣店。而家間間餐廳都話要安心出行，路過見呢間餐廳幾多人排隊，最特別係一間裝修粉紅色少女風的菜餐廳，仲要標榜無味精，所以就一試究竟。餐廳食物嘅種類唔算多，不過有時好嘢係貴精不貴多。我分別點左香煎蓮藕餅豬扒飯、咖哩雞飯和柱侯牛筋腩飯。三個飯都係大約$50一個，買既時候無留意，拎既時候先發覺仲包埋一碗湯。最令我驚喜係香煎蓮藕餅豬扒飯，豬扒應該係香茅豬扒，我剪細咗比BB食，佢仲食到舔舔脷呢。蓮藕餅係用切碎蓮藕和半肥瘦免治豬肉製成，味道剛剛好。咖喱雞飯有得揀辣度，因為我怕辣所以就揀咗唔辣，餐廳實係非常體貼。雖然唔辣不過都有好香嘅咖喱味，我用咖喱汁撈飯食，食晒成兜飯。至於雞係俾咗成隻雞脾我﹐仲要啖啖肉。柱侯牛腩都OK，非常爽口，唔會過淋，蘿蔔清甜，整道菜清清地，唔油膩，幾好味。最令我喜出望外嘅係送嘅湯。我初初以為係味精湯，飲落有淡淡的椰子味，最初以為係椰子，之後俾我發現係土茯苓瘦肉湯。送嘅湯竟然係老火湯仲要係用呢啲材料，$50一個飯真係物超所值，怪不得咁多人排隊。