明記食店

營業中

休息中

5年前返學日日都會食，疫情期間3年屢次經過都未見營業，今年重遊舊地發現終於開門，一如既往多人幫襯，可惜而家無得將摺枱放喺路中心，重現唔到當年坐滿商場地下嘅盛況。今日叫咗一個當年例牌會叫嘅車仔飯組合，豬紅，牛筋，魚香茄子，可惜魚香茄子當時已經賣晒，所以轉咗肉豆炒肉碎，堂食加罐可口可樂，姐姐大殼大殼咁畢餸，多到第三樣餸都冇位擺要直接放上面。食完簡單講一下，一個字，正！豬紅夠入味，食落唔腥但係又好新鮮，牛筋炆得夠時間，食落好有骨膠原嘅味道，最後肉豆炒肉碎第一次食，感覺有啲似台式鹵肉飯個種食法，煮得夠哂淋啲汁又惹味，配埋例牌比起出面大一截嘅飯，唔係淨係得個大字，啲飯食落有口感唔係煮到爛晒果隻。