兩草 (銅鑼灣道) (已結業)

肉骨茶可以話係星馬嘅平民美食，但當肉骨茶嚟到香港，就變咗上等菜（同泰國船麵一樣），貴得嚟味道仲要好參差。今日同M佬去到位於大坑，由舖搬到去大舖嘅人氣排隊餐廳兩草，餐牌選擇雖然唔多，但價錢大眾化，主菜由$20起跳，驚喜係連胡椒肉骨茶都只係$35，價錢就夠晒貼地，唔知味道又點呢？斑蘭咖央多士烘到好似餅乾咁香脆嘅多士，中間夾住牛油同椰香濃厚嘅咖央，一口咬落去，就被佢嘅椰香溶化，好有罪惡感，好好味。滑蛋叉燒飯份量唔多，以女仔嚟講都算夠飽，半肥瘦嘅叉燒切成長條型，再混入豬油、加埋半熟嘅滑蛋、蔥花同甜豉油，豬油令呢碗飯嘅香味十足，但就無咩味，我哋要不停加入枱面嘅豉油調味。另外，而切咗絲嘅叉燒份量唔多，口感欠奉。胡椒肉骨茶眾所周知，肉骨茶有主打藥材味嘅馬拉門派同主打胡椒味嘅新加坡門派，但呢間我就分唔清楚喇。藥材味同胡椒味都唔濃，係淡口味之選，不過，以$35價錢嚟講，仲有三條骨，都叫合格。不過，順帶一提，胡椒肉骨茶係無包到白飯，要另加$10。