富都餐廳 (已結業)

食過幾次宵夜晚飯覺得大如前後，真係成年無黎過了，是日晏晝餓餓地，咁就求其食一間茶記啦。黎左久違的富都，午餐款式無變，入面啲伙計都無乜變，叫左份B餐（$43），一般茶記價位。是日中湯霸王花豬骨湯，幾清甜，無乜師傅味。白汁蘑菇煎龍利柳意粉，個白汁超杰身無乜味，鹹鹹地咁囉，意粉太淋又散，以前食意粉會炒底同硬身啲，今日呢個意粉同放湯啲一樣，龍利柳煎得香口幾好味，配菜只有一堆煲熟嘅椰菜，好過無。熱檸茶就幾好，茶濃檸香。食物水準差左，份量少左，價錢貴左，以前枱有美極同辣椒仔而加又無左，紙巾又無左，感覺各方面都縮緊水。