扒王一哥 (已結業)

聽人講呢間扒王一哥係以前扒王之王開既，於是乎同朋友一齊去試下，睇下搵唔搵到兒時食扒王之王既回憶。入到去餐廳燈光昏暗，枱同格之間唔會好逼，感覺都幾舒服。見番之前係沙田扒王之王好有中氣果位呀叔做伙計，聲線中氣十足簡直係扒王signature ❗️整體嚟講，以旺角地段，呢個價錢，食物質素唔差。百幾蚊鋸個扒，搵到個回憶過下癮之餘，重點係食物都好食嘅。餐湯好香牛油味，忌廉味濃厚。惹味爽口牛脷粒$35，以35蚊份量去睇，物有所值，但口感唔係爽口，反而係肉質係腍，易入口幾好食。法國田螺$58，蒜蓉牛油薯蓉墊係田螺底，好香蒜油味，但薯蓉味道有少少過咸。美國頂級安格斯西冷牛扒$138，西冷肉厚，大塊，肉質有咬口但唔係韌，食得出有肉味。美國黑毛豬扒$138，有啲失望，豬扒細塊又唔夠厚，但勝在肉質唔鞋口，都鬆軟。