黃明記粥粉麵家 (已搬遷) 新店位置

慕名而來，下午點零鐘嘅時候剛好仲有一個卡位，兩個人點左四寶麵和四寶紫菜河，想試多啲唔同嘅丸，問夥計四寶有邊四寶，佢話有魚蛋、墨丸、魚扎和魚皮餃 (奇怪會有魚扎），所以另外點左豬肉丸拼雲吞，再加白灼腰潤。兩碗粉麵嚟到，並非夥計所講嘅四寶，碗河粉有兩粒豬肉丸、兩粒墨魚丸和兩粒魚皮餃 （居然冇魚蛋)，只係三寶。碗麵就有魚蛋、墨丸、魚皮餃和豬肉丸。兩碗都冇魚扎，反而有豬肉丸，如果係咁我就叫雲吞拼魚扎啦⋯⋯ 似乎四寶都係隨心，聽到夥計喺廚房話呢碗冇魚蛋喎⋯⋯ 所以都算啦，反正食完都覺得冇必要試咁多嘢⋯⋯小時候食開香港仔謝記，呢度啲丸始終都係比唔上，除咗謝記冇嘅豬肉丸，質素係唔錯，其他就有啲失望。食完一粒相信類似係墨丸，係淋嘅，有少少霉，冇口感，冇墨魚味。除咗豬肉丸係真係可以贏到其他地方，其餘嘅都係一般。比較欣賞啲河粉，夠幼夠滑，麵嘅份量都唔錯，加$3有紫菜都算幾抵，湯底多油，偏鹹，食完之後都幾口渴，有豬肉嘅雲吞亦都算有水準。驚喜嘅反而係白灼腰潤，質素非常高，幾爽口，有芽菜底，有點兒喧賓奪主⋯⋯