The Salted Pig (D2 Place) (已結業)

本來睇menu都覺得幾吸引幾啱食, 小食叫咗青口、炸魷魚、手撕豬肉nachos。青口配薯條：青口不過不失，無咩鮮味，汁極少，味道偏死咸，配薯條軟身無味。炸魷魚配青檸蛋黃醬：坦白地講，個蛋黃醬比魷魚出色得多。魷魚外皮有調味但完全唔入味。手撕豬肉nachos：整體okay，配酒都唔錯。既然係「豬門店」，主菜叫咗 pork belly 同埋 bbq ribs。Pork belly 好食！豬肉軟身，半肥瘦啱啱好，瘦肉唔會乾身，肥肉亦唔覺肥膩，全餐最高質。Ribs：大失望。肉質乾身唔入味，汁偏濃味，配合唔好食既肉質甚至會覺得好搶，唯一配上既薯條比青口配既薯條好食得多，又脆又香口。飲品方面叫咗自家啤酒、milkshakes、mocktails，不過不失普普通通啦。地方唔算大，但全場得兩位侍應，都幾難叫到佢哋幫忙，預咗要舉一陣手啦。呢間係臨時係附近做嘢想係返附近搵野食而去試，星期六晚上都見有不少吉枱，從食飯質素略知一二。都係個句，香港人真係好肯花時間花錢食嘢，希望多啲有心老闆帶多啲好野食比香港人。