如一

營業中

休息中

同朋友去旺角逛街，行下下落大雨，無帶遮，咁就不如就近食飯先，剛巧見到附近燈箱，見啲菜式幾吸引，所以就上咗樓食晚飯。私房菜館地方細細，只有十張枱左右，裝修唔算富麗堂皇，但係乾淨企理，感覺舒適。冰鎮醉鮑魚 鮑魚size都算幾大，QQ的，帶微微酒香，因為經過冰鎮，好適合夏天食。花膠杏汁白肺湯呢個湯係我嘅至愛，但現在好多餐館都嫌麻煩，唔做呢個湯 。試咗一啖，湯底好濃郁，杏仁味好濃，花膠豬肺好淋滑，感覺好滋潤。如一小炒王 其實就係蒜心炒土魷、鮮魷、蝦乾、辣椒……等。蒜心好嫩，加上爆炒嘅蝦乾土魷同辣椒，好有鑊氣，鍾意食辣嘅朋友就最啱喇。手撕雞 賣相冇乜特別，但食落味道唔錯，雞肉做得好嫩滑，用人手撕開，加上調味，食起嚟好方便。味菜豉椒鵝腸 鵝腸清去大量鵝膏，所以食起嚟唔油膩，加上調咗味嘅味菜，酸酸甜甜，惹味味得嚟好開胃。陳皮蒜子欖角蒸龍躉脊呢個係驚喜之作，龍躉脊啲肉蒸得好滑，加上欖角陳皮，惹味得嚟帶少少欖角清香，係全晚我最愛嘅水準之作。呢間餐廳餸菜味道唔錯，而且碟頭幾大，仲有好多不同套餐可供選擇，係好適合一家大細嚟食飯嘅地方。