廚十三老壇酸菜魚 (渣甸街) (已結業)

自從喺中國大陸唔同地方食過聞名嘅酸菜魚，便一試難忘，希望都可以喺香港搵返類似祿鼎記、太二嘅味道。最近留意到原來【廚十三】係太二美國班底到港開嘅分店，當然要一試。因為只有兩人襯嘅關係，實在叫唔到其他小食，所以只係叫咗兩人份嘅酸菜魚同埋三份配料（豆腐、粉絲、午餐肉）。整間餐廳同太二嘅裝潢如出一徹，都係以黑白漫畫為主。酸菜魚嘅底味其實同太二亦一貫，但魚應該唔係用中國大陸一貫嘅新鮮鱸魚，而係斑類魚（食落似石斑），不過鮮味唔足，亦有唔少碎骨。而酸菜則有少少似香港街市買到嘅咸酸菜（當然更加香口，酸味唔太突出），入口都唔錯。反而配料同白飯都係平平無奇，麻辣香味亦幾適合香港人口味。整體嚟講，【廚十三】係香港能夠食到嘅酸菜魚中質素上佳嘅，但味道仍難媲美太二，價錢亦高大約3分之1至一半。如果大家有興趣亦不妨一試。味道 ⭐️⭐️⭐️⭐️服務 ⭐️⭐️⭐️⭐️環境 ⭐️⭐️⭐️性價比 ⭐️⭐️⭐️