輕鬆一下 (已結業)

週末難得輕鬆一下，同先生睇戲之前食個下午茶醫下肚，呢間係我哋細個成個幫襯嘅小店，以前用「平靚正」可以形容哂，時隔多年再嚟，價錢貴咗唔少。細細個廿幾蚊碗嘅車仔麵，已經加到四十幾蚊一碗，而且麵量偏少。我哋揀咗腩汁幼麵配柱候牛腩、豬頸肉同白蘿蔔，湯底偏淡，牛腩軟腍入味道，豬頸肉同白蘿蔔中規中矩。碗仔翅依然係記憶中嘅味道，濃稠適中，肉絲冬菇等算足料，但魚肉粉感較重。炸脾令人有少少失望，外皮唔脆，輕輕炸過就算，肉質軟嫩但唔夠入味，但必須一讚嘅係侍應會提供手套，唔洗食到隻手油淋淋。車仔麵送熱飲，轉凍飲要加六蚊，算係偏貴。百物騰貴好合理，但加價嘅同時希望質素亦能夠保持，咁先唔會令街坊失望。