759雲吞麵 (已結業)

759連食肆都開埋，又咁近我屋企，無理由唔去捧場，夜晚八點三去到，已經有十幾廿人等緊位！取了籌，共2位，店員話大約要等十幾個號碼，等位期間極無聊，只好在店外四圍拍照，先看餐牌，諗清楚想吃什麼：在長沙灣道那邊，可拍到內在環境及廚房。轉彎行去東京街，又有得影！不知不覺等咗成廿分鐘，望住裡面啲人，好想叫佢哋食快啲，咪坐咁耐！等咗廿五分鐘，終於有位，幸運地唔駛搭枱，仲係面對壁畫嘅梳化位主角來了：鮮蝦雲吞麵，謝謝之前的食家提醒，侍應果然是要在提示下，才加蝦子！共5粒雲吞，尚算大粒。雲吞皮薄，但不易散，包得唔錯，蝦肉十分鮮甜，咬起來彈牙！麵質爽口，同樣彈牙，湯底清甜。蠔油菜心一碟，夠新鮮，軟硬度適中。凍檸檬可樂，自斟自酌！凍檸檬茶，唔夠凍，還有些少澀味！吉列魚柳配餐肉跟咖喱汁，原本是配火腿，但已售罄。白飯分碟上，多飯。餐肉煎得香脆，魚柳炸得油少，口感頗佳，配上巴基斯坦式咖喱汁，整碟飯的水準不俗！每隔張檯都有一瓶辣椒醬，按個人喜好調味。埋單：貴在凍飲，跟餐都要加8蚊！