極尚大瀛喜日本料理 (已結業)

Honey下午突然來電，話有得早收，晚飯多左時間所以想改食日式放題。小肥記得上星期喺互聯網上睇到友人上載咗啲日式放題相，搵返出黎睇卻只見店名「極尚」兩個字。雖然張相講名話係喺尖沙咀度食，不過上OpenRice查過，叫「極尚」o既日式放題似乎只有銅鑼灣o既「極尚大瀛喜日本料理」，見反正係即興，所以就先訂咗張六點o既二人枱 。位於銅鑼灣廣場二期o既「極尚」面積可算為全層，因為餐牌、餐具及單據上都可以清楚見到同層o既「牛脾氣牙涮鍋」其實係有所關連。店子間隔開揚得黎每個散座都極具私人空間，燈光充足但仍不失柔和。大堂o既二至四人散座全為梳化式卡位，室內冷氣足，環境闊落又舒適。  桌上一本厚厚o既記事薄原來係餐牌 。餐店屬放題形式，食物可任食任點，但仍不忘於餐牌中提醒食客要珍惜食物及減少廚餘 ，非常正面。記事薄內有多頁點餸紙，分A至K頁列出不同款式o既日本料理，有刺身、壽司、燒物、天婦羅等，就連雪花牛肉火鍋都有得食，可真琳瑯滿目，全部仲要係即點即煮，確保新鮮。除咗入座後有熱茶之外，酒水同樣係任飲，全放於店子中央四個大雪櫃內。沙律、前菜、小食、雪糕、甜品等則屬自助區食品，歡迎隨時自取回座位