養心殿台式養生鍋 (已結業)

好想食台式火鍋嘅時候第一時間就諗起養心殿。第一次嚟呢間分店，環境非常闊落，極具中國特色嘅設計。我哋叫咗個鴛鴦鍋，一邊係麻辣鍋另一邊係養生鍋。個人認為湯底唔太濃郁，但勝在有好多配料，有蜂巢豆腐同鴨血。我哋叫咗肥牛、豬肉片、響玲、冰菜同墨魚滑等等。響鈴係即叫即炸，所以有好香嘅豆味，肥牛肥瘦均勻，食落口中牛油嘅香味出晒嚟。仲有第一次食冰菜，感覺好新奇，而且係非常甜。我哋仲叫咗湯圓添，放落麻辣湯底嗰邊，鹹鹹地反而更突出左芝麻湯圓嘅咩，搞到我哋忍唔住encore另外而家仲有一個優惠，加一蚊就可以叫一份酸菜魚，份量仲超級多，內有薯粉。魚嘅肉質非常嫩滑，個湯夠酸夠麻，非常喜歡。我會為咗呢個酸菜魚再嚟因為性價比真係好高呀