Asok Thai Cake (已搬遷) 新店位置

中環揾食艱難，又要唔太貴又要有特色，想必會到中環街市看看。有不同類型的食店，除了地下foodcourt, 其他都主要做外賣為主。今日諗住去買外賣返公司食，俾我見到呢間新開的泰式蛋糕店，仲要件件都係打卡之選，就決定買返幾件，同同事分享。係辦公室食榴槤蛋糕，口味好似重咗少少，好濃的榴槤味mousse, 最驚喜係除咗有海綿蛋糕 係入面，仲有mochi, 口感大不同，好有層次。仲有椰青同芒果造型的蛋糕。個椰青睇落同真的一樣，食埋呢兩個就知，都係有海綿蛋糕配多重layer, 增加不同口感。椰青口味會比芒果味清新，有真椰子肉係入面，更有口感。而芒果造型蛋糕，其實係芒果糯米飯味，味道會更複雜，為芒果配搭椰子味的mousses, 再有mochi, 層次更高。雖然賣蛋糕為主，但有見到似donut 的軟麵包同糯米糍，就各買咗一件做午餐。香蕉味的糯米糍，個糯米糍煙靭得嚟又好軟熟，食到香濃的香蕉味道，入面有海綿蛋糕同忌廉, 細細一件都有唔同層次。而軟麵包就係椰子口味，外表同donut 一樣，少少沙糖係表面，中間有口感比較輕的忌廉餡，淡淡的椰子味，唔會膩，同埋價錢相宜。