龍圖閣海鮮飯店

營業中

休息中

今晚約咗家人食飯，揀咗呢間之前電視介紹過嘅中菜館，啲菜式真係幾有質素，餐廳位置又方便。蝦多士新鮮熱辣炸起，多士好酥脆，蝦膠份量好足，爽口彈牙有鮮味。好耐冇食過呢個懷舊菜式，好回味。話梅拌涼瓜D涼瓜好爽脆，散發住淡淡話梅香氣再加上檸檬清新香氣，呢個餐前小食好適合大熱天時食。椒鹽墨魚咀呢個菜式出邊比較少見，就算有都好難有好嘅質素。呢度嘅墨魚咀大大嚿，多肉爽脆，完全唔會韌或者硬。酥脆嘅薄薄炸粉包住墨魚咀加上惹味嘅椒鹽，好好食，食唔停口，佐酒小食首選。冰川咕嚕肉一大盤都幾震撼，玻璃碟擺盆，打卡一流。冰鎮嘅咕嚕肉原來可以咁脆，仲要脆得黎係唔硬，好酥脆，裏面嘅肉偏肥，豬油非常甘香，入口融化，肥而不膩。佢個咕嚕汁係用傳統山楂，食落有股獨特香氣。呢個菜式真係一試難忘。沙薑雞煲一上枱，咋咋聲，散發誘人沙薑香氣，好有鑊氣，啲雞真係好香口嘢味，而且好亂畫，啲配料例如洋蔥同西芹吸入晒啲雞精華，好好味。淮山炒勝瓜食完咁多香口野，食返個清清地嘅炒菜，勝瓜爽腍，淮山同埋百合爽口，好清爽。