李家 (筲箕灣道) (已結業)

炸雞控又出動，鍾意食炸雞嘅朋友應該對呢間來自韓國嘅李家炸雞唔會陌生。今次揀咗響西灣河呢間分店。人少少只係叫咗兩樣野- 「原味炸雞」同「芝士味炸雞」各半隻，加個「牛肉炒粉絲」。上菜已經聞到炸雞陣陣嘅香味，入口真係不得了。炸得好鬆脆，唔會好油膩，雞肉嫩滑，真係好正。原味同芝士味各有特色，我自己就比較喜愛原味，但鍾意食芝士嘅朋友可以試下芝士味，佢落重芝士，味道勁出。牛肉炒粉絲分量十足，三幾個人都足夠。粉絲好軟熟煙韌，配埋牛肉、紅蘿蔔絲、洋蔥同菜，炒得十分香口，甜甜地，味道好好。餐牌亦有唔少酒精同非酒精飲品選擇，啱晒一邊食炸雞，一邊飲嘢。我地點咗黑莓梳打同檸檬梳打各一杯，口味清新，食炸雞一流。餐廳環境寬敞，好有韓國feel，適合一班人食飯吹水飲野，下次有機會再約多幾個朋友，可以去試吓其他炸雞口味同菜式。