黃金燒味 (已結業)

今日咁岩嚟到灣仔，經過見到呢間燒味餐廳環境唔錯，而且不嬲都好鍾意食燒味，咁就一於去試吓啦。呢度有別於其他食燒味嘅地方，因為通常都比較迫同環境唔會太注重衛生，但係呢度唔單止位置好坐，而且裝修都幾靚，最緊要係環境夠晒乾淨。一坐低佢就俾咗兩碟青瓜我哋，食落酸酸地好開胃呀。我同朋友就叫咗一個滷水拼盤同埋一個燒味拼盤，而我仲另外叫咗一碗瀨粉。呢碗湯好好味，飲落夠味但係冇味精，飲完唔會覺得口渴。燒味拼盤分別係油雞，乳豬，叉燒，燒鵝。我自己覺得四隻都咁正，但我最推介嘅係乳豬。因為佢唔單止個皮夠脆，而且食落唔會太肥，皮脆肉嫩，點埋甜醬真係一流呀。呢個滷水拼盤分別有生腸，分題，牛展，鵝亦。我自己覺得最正嘅係生腸，因為佢除咗口感一流，而且滷水都好入味呀。雖然呢個係淨瀨粉，但食落原來都有特別。因為佢嘅湯底係有少少藥材味，食落唔會太淡，而且感覺好健康。呢間燒味餐廳環境又好，價錢又平，估唔到啲燒味都一流，下次一定會再嚟食呀。