泰Grill (享和街)

今日去荃灣食泰國菜，繁忙時間餐廳裏面好多人，我同朋友喺門口等咗一陣，老闆好好人俾咗我哋一人一罐汽水，可以一路飲一路等。入座後急不及待即刻叫嘢食，叫咗一個泰式酸辣鳳爪沙律、飛天通菜、豬牛雞串燒、豬頸肉炒飯，同埋甜品椰汁糕。鳳爪沙律有得揀小辣同芥辣，朋友鍾意食大辣，所以我哋挑戰食大辣，但其實唔算好辣，我哋冇飲水都可以食晒成碟。鳳爪去咗骨，啖啖肉連埋軟骨，柔軟又硬，口感好特別。飛天通菜值得推薦，鑊氣夠，夠大碟，加上少少辣，非常開胃！半打串燒，可以自己揀想要幾多串牛豬雞肉。最特別係個醬，甜甜酸酸，用嚟點串燒非常適合。最好味係串燒豬，豬肉肥瘦適中，外層燒到脆脆地，食落去非常香口！豬頸肉炒飯都非常出色，炒飯裏面有好多片大大塊嘅豬頸肉，食到停唔到口。椰汁糕亦好好味，淡淡既椰香，口感Q彈，食完令成餐飯變得圓滿左😆如果大家鍾意食泰國菜，推薦大家黎試一試！