影片
更多
2012-09-18
1251 瀏覽
Auntie宴客，請好友及晚輩食半價美味粵菜：珀麗酒店內之「珀麗心軒」。酒店地點其實巴士，小巴，地鐡，電車，乜都到，不過如果小肥唔係同人肉地圖大肥爸爸一齊黎，真係未必會搵倒，因為都幾隱蔽下。聽auntie講，喺度食飯可以享有兩個鐘頭免費泊車優惠，無奈XO當晚有意飲酒，所以為安全起見都係決定搭的士！小肥都係第一次見倒一間酒店中菜餐廳以全男班黎招呼客人，感覺頗為意外。大家千奇唔好意為佢地會好粗鄙呀，因為佢地每一個都好有禮貌，態度亦好誠懇，而且仲溫文過好多酒店姐姐仔架，酒店真係好有眼光！Auntie一早叫哂餸，其中幾款係心軒o既招牌菜，由小碟到甜品佢都精心挑選過，希望大家喜歡： 涼伴木魚豆腐：埋位第一樣上枱o既小食，唔係我埋單，所以唔知係咪免費。豆腐小辣，好野味，大家都好啱食，食完一碟再叫佢黎多碟。 海苔香酥金菇菜：依款小碟好有特色，亦做得非常出色！首先，個餸做得好似薯片咁香口乾脆薄身，送酒一流！再者，唔講真係食唔出個炸物係由金菇做o既，因為個金菇菜完全唔黐牙，又唔韌，真係妙極，妙極！哥哥仔解釋話「金菇菜」其實係指金菇加紫菜所炸製成之菜式，經師傅鑽研過認為此乃金菇之最佳食法。XO仔其實好驚食
小肥都係第一次見倒一間酒店中菜餐廳以全男班黎招呼客人，感覺頗為意外。大家千奇唔好意為佢地會好粗鄙呀，因為佢地每一個都好有禮貌，態度亦好誠懇，而且仲溫文過好多酒店姐姐仔架，酒店真係好有眼光！
Auntie一早叫哂餸，其中幾款係心軒o既招牌菜，由小碟到甜品佢都精心挑選過，希望大家喜歡：
涼伴木魚豆腐：埋位第一樣上枱o既小食，唔係我埋單，所以唔知係咪免費。豆腐小辣，好野味，大家都好啱食，食完一碟再叫佢黎多碟。
海苔香酥金菇菜：依款小碟好有特色，亦做得非常出色！首先，個餸做得好似薯片咁香口乾脆薄身，送酒一流！再者，唔講真係食唔出個炸物係由金菇做o既，因為個金菇菜完全唔黐牙，又唔韌，真係妙極，妙極！哥哥仔解釋話「金菇菜」其實係指金菇加紫菜所炸製成之菜式，經師傅鑽研過認為此乃金菇之最佳食法。XO仔其實好驚食金菇，事關曾經因咬唔斷而哽親，造成童年陰影，不過依道金菇菜真係令我嘆為觀止！據說「海苔香酥金菇菜」係鎮店名菜之一，平時唔食金菇o既朋友都真係要去試下！
香麻海蜇頭：麻油味香濃，海蜇頭爽脆，食左三味小食已經覺得間餐廳好有水準。
當晚，Auntie其實仲叫左兩款頭盤，不過因小肥怕魚，所以冇食到：蟹醋脆鱔，海苔白飯魚。
碧綠芝麻蝦球：蝦球係雪藏蝦，不過咁o既價錢亦無可厚非，要讚o既係蝦球同西蘭花一樣做到好爽脆，小肥只係略嫌沙律醬重手左少少。（唔知XO有冇食錯呢，個餸好似有好輕微o既芥辣味咁。）
玉露骨香龍俐球：咁多味之中以依道龍俐球較為失色，魚球都尚算脆口，魚肉又夠軟，可惜就腥左少少。如圖所示，起哂肉之後，師傅張條龍俐骨炸製過，做成一條「玉露骨」，爸爸同其他魚迷們都話除左條尾之外，全條都好香脆，一定要讚咁話。
稻草牛西施：此乃XO個美女廚神波Ｃ最喜愛之菜式也！因為個牛冇骨，大家都估佢係牛腩。波Ｃ好欣賞個牛可以做到唔嚡，唔韌，唔乾，啲肉又唔會一絲絲，而且咁入味！連美女廚神都讚不絕口，真係唔講得笑！假如大家真係黎試，請留意稻草罅間其實仲有好多肉架，嗰晚好彩小肥後生眼利睇得好清楚。
愉耳紅燒豆腐：豆腐經煮炸過，皮脆心嫩，又夠入味，very good！
客家沙薑雞：睇倒雞骨上呈現出鮮紅色，即代表隻雞係新鮮而唔係冰鮮或雪藏o既。小肥只食雞胸，全隻雞最嚡或者可以話係最難控制o既部分，真係好難得雞胸肉可以如此嫩而軟！此外，雞皮上係冇哂毛，非常衛生，連皮食雞胸真係頂瓜瓜！沙薑汁同薑蔥都係另上，食客可以自選醬汁；其中一位唔係好食汁o既auntie話唔點汁一樣咁有味，好野！
川椒豆腐肉鬆炒通菜 & 上湯浸莧菜：如果有睇開小弟o既食評都應該知道小肥最唔鍾意食菜，所以意見全屬在座其他客人：兩款菜都好新鮮，煮得唔會老，又夠入味，唔錯wor。
鮮果鯉魚布甸：淨睇賣相，全場已經嘩聲四起，仲千叮萬囑叫我影多幾個角度同大家分享；鯉魚布甸中紅色為紅豆味，黑色為芝麻味，黃色為芒果味。連唔好甜品o既媽咪都忍唔住要每樣試一口，咁已經值回票價啦！咁多款之中以星形桂花糕最清，所以第一樣就食佢，桂花味清香，綠茶味濃郁，個糕軟度啱啱好，唔會太梗又唔會鬆軟到一夾就散，果然有啲Chinese Kongfu！鯉魚布甸當然唔係只得個樣睇啦，三款都咁香滑美味，完全唔需要點花奶，小肥同大肥最鍾意有粒粒芒果肉o既黃色香芒布甸，食完身痕（因小弟對芒果敏感）都要食！
酒店而家做緊一個推廣優惠，就係逢星期一至五晚餐時段食物全面五折，而週末就七折。我地當晚十個人，埋單連加一，千三蚊有找！平均每人百三蚊，有雞，有魚，有蝦，有牛，有菜，包埋甜品同茶芥，酒店級服務及環境，食材同菜式質高有水準，個個仲要飽到攬住個肚，我地全枱人都覺得真係超抵，所以月底前（即推廣期完之前）一定會返黎再幫襯！
張貼
