樂湯雞麵館 (登龍街) (已結業)

今日又喺銅鑼灣搵食，路經呢間樂湯雞麵館，聽到姐姐大力宣傳佢哋超抵食嘅午市套餐，一於入去試吓！午市套餐總共有六個，我哋嗌咗口水雞配細雞湯（$58）同埋滋味汁雞絲撈米線（$58），全部午市套餐都係$58，白飯轉 刀削麵/米線/米粉/粉絲/菜底只需要加$3，超級抵食，所以我就直接轉咗個刀削麵。刀削麵幾有咬口，咬落幾彈牙，麵質都幾爽口，配埋雞湯都幾清甜，鍾意食辣嘅都可以任加辣椒油，我就唔客氣落咗三大羹，因為辣椒油都唔算好辣。口水雞都唔係好辣，唔係用返任加嘅辣椒油，幾有誠意，雞肉幾嫩滑，一啲都唔肥，連埋皮食都唔會覺得好有罪惡感，凍凍地幾開胃。雞絲撈米線都幾爽口，都可以任加辣椒油，幾適合而家熱辣辣嘅天氣食。最正嘅係午市套餐仲要配汽水，加兩蚊就可以轉道地無糖烏龍茶或者豆漿，喺銅鑼灣50幾蚊食到個午餐仲連埋嘢飲真係幾抵食，打工仔午餐之選！