紅橋 (已結業)

今日去到旺角，兩點幾先至搵嘢食，咁就行到旺角天橋下面有一間紅橋餐廳，見入面應該都幾舒服咁就同朋友一齊入去食遲來的晏啦，坐落原來都係用手機落單嘅，咁就好快噤點咗兩個午餐同埋一些小食加飲品，朋友就點咗個忌廉濃湯稻庭烏冬配蒜香蜜糖豬扒加牛角包，再加20蚊嘅煙三文魚蜜桃沙律，西湯；我就點咗墨魚汁海蝦燴意大利飯，西湯，加18蚊點咗芝麻蝦多士，再加22蚊點咗蜜椒單骨雞翼，重有兩杯熱檸蜜送！啲餐嚟曬嘅時候，真係兩張枱都擺到滿曬。首先個西湯係忌廉蘑菇湯，飲落都好creamy，唔錯！至於個墨魚汁海蝦燴意大利飯，啲海蝦超爽口，每粒飯都索滿墨魚汁，如果啲墨魚汁濃味一啲，就真係完美啦！芝麻蝦多士跟煉奶，食落爽脆，蝦膠淋滑，值得推介；而那個蜜椒單骨雞翼，都外脆內軟，仲有肉汁，做得很好！至於煙三文魚蜜桃沙律都算新鮮，如果多幾片煙三文魚就更好！忌廉濃湯烏冬嘅烏冬爽滑彈牙，十分之合我口味，值得一讚！蒜香蜜糖豬扒，睇落乾咗啲，但食落都算淋滑，仲有少少脆面！個牛角包就中規中矩！全部埋單，二百蚊有找，真係超抵食！餐廳坐落舒服，冷氣好夠，服務亦相當之好，值得一試再試。