鍋心海鮮燒 (已結業)

鍋心一向都出名高質抵食！之前幫襯過幾次鍋心嘅海鮮粥底火鍋，海鮮種類多又新鮮，次次去食都飽到捧住個肚返屋企。而呢間鍋心海鮮燒係主打燒海鮮同串燒。$248套餐包括一人半隻龍蝦/蟹、自選六款海鮮、串燒小食、迷你焗飯。海鮮嘅調味都有幾種選擇，有最大路嘅芝士焗蒜蓉焗，亦有鍋心自家製嘅泰醬，食落好香辣椒味少少酸。食得辣嘅話，有部份海鮮仲可以揀辣水煮。我地就揀咗芝士焗龍蝦、泰醬鮑魚、蒜蓉焗蠔、蒜蓉花甲、蒜蓉刀貝、蒜蓉貴妃、蒜蓉帆立貝。芝士焗龍蝦比想像中大隻，肉質彈牙食得出係新鮮。鮑魚都好大隻又厚肉，食落爽口彈牙，同酸辣惹味嘅泰醬好夾。其他貝類屬於鍋心嘅一貫水準，即係好好味，全部都鮮甜無沙除咗海鮮，套餐仲包括串燒同小食，串燒每人可以揀兩串，小食每人揀一款。串燒同小食有成幾十款揀，我平時無選擇困難症都諗咗一陣，因為好多款睇落都好吸引。最後揀咗兩串孜然雞翼、汁燒香蔥牛肉卷、辛辣香蔥牛肉卷、炸芝士年糕　同埋　葡汁椰菜花。孜然雞翼係開邊燒方便食，燒得啱啱好雞皮夠脆而雞肉又唔乾。香蔥牛肉卷不論汁燒定辛辣味都好夾，調味啱啱好惹味得嚟唔會太咸。食到呢度已經飽咗，但原來仲有迷你焗飯未食。葡汁爆谷雞飯本身諗住太飽會食唔