霸嗎拉麵 (已結業)

同朋友仔冇食早餐去睇戲，睇完戲大概下晝一點幾好肚餓呀，就喺附近是但搵一間醫肚。見到呢間Lunch set幾抵喎！ $68就有一碗炙燒豚肉味玉拉麵+3隻羽根餃子連埋嘢飲！呢度嘅叉燒係厚切，大約都有2cm咁厚，而且唔會太肥，啖啖肉！燒過之後好香，個湯底好濃豬骨味。平日食拉麵都要另外加溏心蛋，呢度已經包埋！重要煮蛋既時間拿捏得非常準確，一咬開蛋黃就啤啤聲流晒出黎！而且蛋白部分醃得好入味！超正！拉麵雖然無得揀軟硬度，平日食開偏硬麵質既我都幾滿意！餃子係後上，佢加左啲生粉水煎到有個脆卜卜底，將佢地三隻連埋一齊，皮好薄，啲餡唔會好鹹，肉同菜比例平均。野飲除大可樂個啲汽水之外重有雀巢檸檬茶揀，不過我唔飲汽水呢類甜野凍野，建議有茶揀會更好。