勝八居酒屋 (已結業)

假日一支公係銅記搵食又唔想同人逼餐懵，第一時間就諗起永光中心。呢度樓上出名多選擇，特別係日本菜，單係勝八就有分開居酒屋同鉄板串料理。搭𨋢上到黎11樓，門口唔太起眼，但見門口廚師推介有「吉列和牛」。自從東京旅行之後一直冇再食過吉列和牛，今次黎到回憶馬上返晒黎。黎食日本料理，點都要叫番幾件刺身食先。細細粒八爪魚吸盤，咬落唔會太乾，爽脆陣牙！至於鯛魚捲芽蔥，食落feel到少少嗆辣又唔會搶走魚既鮮味，感覺都好清新。BTW食呢碟刺身拼盤完全冇沾過wasabi，全因廚師特意準備左梅子醬，微酸帶甜，用黎沾刺身食零舍開胃。最期待就係眼前既厚切吉列和牛，聽師傅講牛肉選自澳洲M7，煮既時候只係放入炸爐高溫炸熟外層，再等油溫熱力整熟肉身，難怪食落似食緊六七熟咁鬆軟，直頭用門牙都咬得爛。又可能因為高溫將部分油脂逼走，食落反而唔會食口油，又一新食法發現。最可惜係今次只係散叫食，原來食Lunch set仲有八五折優惠呢。