岩鹽日本料理 (利舞臺廣場) (已結業)

銅鑼灣有好多好嘢食，今次就試咗呢間係利舞臺嘅岩鹽日本料理。店員嘅服務態度非常好，好有耐性咁解釋推介食品同埋優惠，座位都好舒適，岩哂weekend黎歎下好嘢。我地嗌咗個九州魚生丼，個賣相超靚，有八、九款刺身係飯上面，有甜蝦、吞拿魚、三文魚、油甘魚等，仲有海膽同三文魚子，全部都好厚身同好新鮮，真係超級正。另外我地仲嗌咗個火炙壽司配牛肉烏冬定食。牛肉烏冬嘅湯底好好飲，牛肉味幾濃。壽司有八件，全部都好靚，一啲都唔馬虎，仲有香港好少見嘅炙燒左口魚，充滿魚油，好好食。兩個套餐都有麵豉湯、沙律、同埋漬物，好豐富。最正嘅係佢而家做緊優惠，晚市嗌任何食物都可以半價叫松葉蟹三文魚子海膽丼或者海膽生蠔。我地就嗌咗海膽生蠔，六隻生蠔只係$98 ，雖然唔算好大隻，但係好新鮮，配埋上面嘅海膽同三文魚子，真係好抵食。希望下次可以試吓其他嘢食啦。