薈軒 (已結業)

今日下午我們約咗個客喺灣仔合和中心嘅「薈軒」見面，順便一齊飲下午茶！我們叫咗皮蛋瘦肉粥嘅粥底煲得好綿，材料好足料，皮蛋好甘香軟滑！川芎白芷燉魚雲係我們每次嚟都必叫㗎，因湯底嘅相當甘甜濃郁，魚雲嘅肉質相當鮮甜嫩滑，而且份量十足！黑糖薑汁糕嘅質感非常煙煙韌韌，黑糖同薑汁嘅比例恰到好處，雖然第一啖食落去就有好清香嘅薑汁味，但慢慢就會滲透出香甜嘅黑糖味，真係好正呀！鴛鴦流沙包就咁睇表面以為係平平無奇嘅包，點知撕開一半就令我們非常驚喜，因餡料除咗有奶黃流沙之外，仲有芝麻流沙，味道相當香甜濃郁，而且非常夾，唔會有怪怪嘅感覺！肚皇海鮮扎同平日食開嘅鷄扎唔同，除咗材料係用嫩滑嘅魚肉、爽口彈牙嘅蝦滑同蟹柳之外，用嚟包紮著嘅唔係一塊腐皮，而係用粉絲，感覺好特別，而且創意十足！貴妃素翅餃嘅餃皮相當薄身，因為餡料有木耳同紅蘿蔔絲，所以口感相當爽脆！