倫住蒸倫哥私房菜 (已結業)

倫哥出名打邊爐，之前都係尖沙咀試過，今次嚟到太子試新野，係食蒸海鮮啊😍😍未開始食就先飲返個燉湯，好多料啊！蒜蓉粉絲蒸蟶子，夠大隻！蒜蓉蒸海蝦，唔係好大隻，不過幾鮮幾彈牙。果皮蒸鮑魚，爽口得來會唔會咬極都咬唔開，同埋原來冇豉油都好入味！蟲草花蒸龍躉，魚肉好滑，仲配埋有黑松露嘅豆腐添，都好香呀！薑蔥蒸蠔，影得唔係好靚，不過其實好大隻架，同埋都幾重海水味幾新鮮。清蒸龍蝦，大過我成隻手掌呀！店員推介龍蝦清蒸已經好好食，果然冇介紹錯！蒸花蟹，細細隻，不過都算多膏！除咗海鮮，仲有蔬菜食吓，加少少鹽蒸都已經夠味。鮮魷腸粉，出乎意料之外咁好食！沙茶醬加埋魷魚嘅鮮味，雖然食到最後已經好飽，但係我哋成盤腸粉都清晒，因為真係好好食！最後仲有八寶蒸飯添，雖然已經好飽，不過都要試吓個飯，因為好香呀個飯！記得留肚食下啦！最後要一提，係度唔使驚啲海鮮會蒸到老晒或者唔知要整幾耐，要估估下！因為呢度每一個餸都有店員幫你蒸，仲會計時添，所以翹埋雙手就有得食喇！