CHIMAC (德福廣場2期) (已結業)

德福廣場foodcourt新開咗呢間Chimac，主打食韓國炸雞、意粉、吐司。我哋見menu啲圖幾吸引，就試咗一個套餐加半隻炸雞。有骨經典甜辣炸雞配卡邦尼意粉$68呢個set都幾豐富，有炸雞、意粉、飲品都有齊，炸鷄有6款口味，仲有無骨/有骨嘅選擇。我哋就揀咗有骨經典甜辣炸雞，有三件，甜甜辣辣味道好啱夏天食，雞皮香脆，雞肉Juicy，飲埋可樂，幾正。意粉方面，我哋揀咗卡邦尼，醬汁好creamy，有蘑菇片、煙肉片，而且好多芝士粉，充滿奶香，芝士控不能錯過。人氣無骨蜜糖牛油炸雞半隻$68另外我哋仲叫咗半隻炸雞，蜜糖牛油炸雞味道冇得輸，牛油香，蜜糖甜甜的，配上脆卜卜嘅雞皮同埋嫩嫩雞肉，啖啖肉冇骨，食得好過癮。炸雞下面仲有一啲薯條，滴左啲蜜糖落去都好好味，又飽肚。另外都值得提，餐廳細心提供買即棄手套，食雞唔使驚搞到成手污糟晒，又衛生啲。