鼎豐雞煲泰國菜 (已結業)

朋友一直都係泰國菜fans，所以今日就同佢黎到食呢間鼎豐雞煲泰國菜。餐廳非常乾淨，而且裝修好新，每檯之間都留有足夠既空位，坐得好舒服，好啱一班朋友黎gathering。黎之前見唔少人都讚佢個泰國椰青雞煲，搞到我都好期待試下，所以就叫左半隻雞。雞煲上既時候有人過黎刮椰青肉同倒椰水，果然係真材實料！落雞之後煮5分鐘就可以食啦～啲雞非常嫩滑，而且半隻雞都好多肉食。食到咁上下就會有人過黎幫手浮走啲雞油，之後就可以飲湯啦！雞湯好鮮甜，飲左幾碗都唔會口渴，值得推介！打邊爐配料方面，我地叫左皇帝菜同脆肉鯇骨腩，兩者都食得出係新鮮既，但就冇咩特別咁～泰菜方面，我地叫左個黃咖喱牛頸脊石鍋。黃咖喱非常惹味，有濃濃既椰香之餘仲得食出有唔少香料。而牛頸脊充滿肉香，分量都好多。仲有其他配菜例如薯仔、三色椒、車厘茄等，好豐富。我地叫左份酥餅黎送咖喱，好滿足～飲品方面，我地叫左龍眼冰。龍眼冰超大杯，而且有滿滿既龍眼肉，好抵飲！順帶一提，店員既服務態度非常好，值得再次幫襯！