銓滿記餐廳小廚 (已結業)

我係Carmen Tam~~用Facebook log-in 0既﹐唔係好識點整返個似樣D0既user name。今次係第一次忍唔住手寫食評﹐因為呢餐飯係食得好開心~ 話說尋日同BF行完街街就去0左呢間朋友介紹我去食0既銓滿記﹐賣點話係海鮮同煲仔飯。我地叫0左個$198二人魚翅海鮮煲仔飯餐﹐入面有兩大碗翅﹐聖子皇x2﹐鮑魚仔x2﹐辣酒煮花螺或者炒蜆﹐自選煲仔飯(我地要0左扇貝煲仔飯)﹐油菜....好多0野﹐仲送0左老火湯添~~ 個湯好好飲﹐真係好老火﹐飲完好溫暖^_^。個翅真係一排排﹐非常似樣﹐味道都幾好。海鮮最出色﹐好新鮮同埋教得個味好好﹐蒜蓉粉絲蒸好香﹐聖子皇要分幾啖先食晒一隻﹐鮑魚仔都唔係細﹐但唔係我0既最愛。辣酒煮花螺勁惹味﹐都幾大粒下﹐粒粒新鮮﹐都算多﹐成個沙煲都係~煲仔飯好香﹐我鐘意拒D焦同甜豉油﹐飯粒好有米味﹐扇貝好好食﹐但下次想試下田雞同潤腸0個種傳統D0既。職員好有禮貌﹐服務十分好﹐老闆又好人又好傾﹐環境企理﹐幾好坐﹐一定會再幫襯﹗