幸福駅 (已結業)

下午茶想食少少小食，就嚟咗呢一間，價錢幾平🥰一個主餐如果加嘢飲都係三十幾蚊～今次同朋友就食咗櫻花蝦玉子燒，玉子燒得啱啱好，厚實得來嫩滑，口味就偏甜，但加上櫻花蝦鹹香，令到玉子燒唔會好膩幾好食呢，下次來會想試埋其他口味！炸蠔$20有四隻，真係抵到爛呀！炸得脆身唔厚粉，入邊都仲係多汁嫩滑，雖然唔係好大隻但都值得一讚！餃子皮偏厚左少少但係味道幾唔錯。芝麻雞翼有好香嘅芝麻味，外皮味道幾有特色，炸完入邊仍然係十分之多汁，雞肉嫩滑，好好食！另外叫嘅豬扒三文治🥪估唔到豬扒有成五毫子厚，物超所值的感覺，豬排唔乾身中間夾少少沙律同菜，口感好豐富。仲有跟餐送的泡芙，一啖一粒，吉士醬幾滑身，少少地當飯後甜品都唔錯～成間店最畫龍點睛就係茶飲！玄米茶就同普通嘅玄米茶冇咩太大嘅分別，但係配上炸物嘅話就會覺得好可以解到油膩，桂花烏龍茶真係正到一定要試！佢嘅茶冇加糖，所以係完全感受到佢嘅清香，第一啖飲落去係烏龍茶，甘苦微澀，之後就開始會有佢慢慢滲出桂花嘅香味，同烏龍茶真係好夾㗎！兩者平衡得好好，好過平時出街嘅茶飲，好推薦呢一間店呀！雖然未必咁方便去到，但係質素真係幾好！