一鍋堂 (大鴻輝(荃灣)中心) (已搬遷) 新店位置

今次揀咗食午餐火鍋放題套餐B ，要咗養生藥膳湯底，一上枱已經聞到好大浸嘅當歸味，除咗當歸，仲有杞子、黨參、桂圓、紅棗等，好滋補！打火鍋之前慣咗飲一飲湯底，呢款湯底冇味精，又夠味！套餐B包左幾款靚牛肉，必食推介一定係美國安格斯牛肉、封門柳、牛板腱。幾款牛肉質上乘新鮮、雪花均勻、牛肉味濃，其實食幾碟牛肉已經返本。其他火鍋配料都好特別，有幾款自家制餃子，芫茜控必試芫茜餃！呢度仲有好多手打肉丸、手打魚腐同手打魚滑，好出色，好彈牙，我就最鍾意手打孜然雞丸同櫻花蝦手打鯪魚滑，因為夠晒特別，唔係度度都食到！呢個套餐仲可以任食多款海鮮，好似有花膠、白鱔片、海蝦、帆立貝，種類都幾多，而且好新鮮。呢度嘅嘢飲都落足本，一定要飲嘅係佢哋自家製嘅飲品，冰糖燉檸檬夠晒清甜潤喉，洛神花茶酸酸甜甜就好開胃，打邊爐飲真係一流！