你妳 (運通洋樓) (已結業)

荃灣出名多好嘢食，今日同男朋友嚟到呢間近排都幾hit嘅你妳食晚餐～餐牌雖然得短短幾頁，但食物嘅種類都幾多。而且有好多都係飽肚嘅嘢，大家一定可以食到飽飽～第一樣當然要介紹吓最出名嘅白兔糖吐司，好多依啲台式小店都有芋泥吐司，如果有食過嘅話都應該知道佢係凍凍地好似一個甜品咁食。依度嘅芋泥吐司加咗白兔糖麻薯，好軟滑又有奶香味，成件事都幾夾～第二樣係芝士肉鬆蛋餅，餡料都幾多！成舊厚厚的～芝士同肉鬆都係比較鹹嘅嘢，好彩佢有一個甜甜地嘅醬料，有驚喜！由於我哋兩個人驚唔飽肚 （實在係太天真）所以叫多咗一個主餐，台式小店當然要試吓滷肉飯，呢度個便當會有少少蒜蓉粟米同埋糖心蛋做配菜。滷肉飯入面加咗啲豆卜碎索汁，輕易地就清晒成個飯。隨餐有飲品同一個幾特別既湯送，我哋揀左蝦捲～雖然食哂上面既野都其實好飽，但食台灣野又點可以無小食😌 台灣腸仔都好難唔好食🤣 小食份量都幾多～另一個小食係相對等左一陣既鹽酥雞，但愈等得耐就愈興奮😆因為姐係佢係即刻炸！ 果然黎到不負所望，係熱辣辣岩岩炸起既～調味都好好唔會過咸，依一個係我覺得飽都要叫既小食～順帶一提 性價比都幾高～我哋兩個人食到咁都只係每人百幾蚊～