麻痺雞 (已結業)

話說我哥一直同我講佢好想食雞煲，所以就帶咗佢去一間大埔隱雞煲店-麻痹雞！呢一間正宗重慶雞煲店位置真係比較偏僻，太和站一出近消防局位置，再過天橋行2分鐘就到達。雞煲店以小店形式經營，細細間，唔會有太大空間感。餐牌顯示有唔同嘅雞煲、烤魚、牛肉煲等選擇。由於哥唔食辣，於是我哋就揀咗藥膳醉雞煲（$168一位）另外一張order form主要係點任食火鍋配料，我哋仲另外嗌咗手切安格斯肥牛（$68例）同埋廣島生蠔（$58，6隻）。嗌完嘢食就去飲品櫃拎野飲，我揀咗支裝鹹柑桔，哥就揀咗荔枝梳打。然後就去拎調味品。每次打邊爐我一定放勁多生蒜！等一陣，先嚟藥膳醉雞。醉雞放滿各種藥材，等到湯底滾起就放入雞件。細心嘅店員小心翼翼將醉雞倒入湯底。然後再等雞煲再一次滾起，就可以開始食啦！食之前先飲一碗湯，嘩真堅料喎！藥材味超濃！雞件肉質嫩滑，冇乜碎骨。手切安格斯肥牛，入口牛味濃郁，唔韌，一個例牌足夠兩個人食，除非你係牛魔王就另計！六隻廣島生蠔非常肥美，淡淡海水滋味，好想一個人食晒六隻生蠔。另外，我哋亦都嗌咗一啲火鍋配料，包括有午餐肉、薯仔片、花枝丸、紅薯粉同生菜，配料新鮮，而且冇落漏單嘅情況，抵讚！