真‧章魚無雙 (已改名) 查看

食緊麻辣燙嘅時候，聞到好香黑松露味，見到原來係隔離個女仔食緊呢度嘅黑松露章魚燒。因為好鍾意黑松露，忍唔住都買咗一份嚟食，仲要係買八粒添。見到呢間野好多人買，諗緊乜章魚燒有咁吸引咩，定係有好多人都好似我咁鍾意黑松露？直至我買咗一份，食咗啖，我終於明白了。黑松露章魚燒（八粒）$40章魚燒唔太油，皮好薄。平時啲章魚燒好多時都只係有好少好細塊章魚，再加少少粟米同埋菜。但係呢間嘅章魚燒，應該有三份二嘅空間都比章魚佔據左，有好大好大舊章魚喺每一粒章魚燒入面，即刻覺得好抵，同埋好正。個黑松露醬亦都唔係只係俾少少，而係每一粒章魚燒上面都鋪滿晒厚厚嘅黑松露醬。每一粒章魚燒都有好濃厚嘅黑松露味。唔只係可以聞到，更加係可以食到。雖然$40比起平時嘅章魚燒係比較貴，但食完之後都真係覺得佢足料嘅。